പ്രപഞ്ച സൃഷ്ട്ടാവായ അല്ലാഹുവിനെ അറിയാലാണ് മനുഷ്യ ജന്മത്തിന്റെ ധൗത്യം. ശരീഅത്ത് അതിനുവേണ്ടി അല്ലാഹു നൽകിയ ഒരു സമഗ്രമായ ജീവിത പദ്ധതിയാണ്. അതിനെ ഒരു സമുദ്രത്തോട് ഉപമിച്ചാൽ ആ സമുദ്രത്തിലൂടെ ലക്ഷ്യത്തിലേക്കുള്ള യാത്ര നടത്താൻ വഴിയറിയുന്ന ഒരു കപ്പിത്താന്റെ കപ്പലാണ് ത്വരീഖത്ത്.

പരിശുദ്ധമായ അല്ലാഹുവിന്റെ ദീൻ പ്രകടനപരതയുടെ പിടിയിലമർന്ന സമയത്ത് ഒരു പരിഷ്കർത്താവായി ഉദിച്ചുയർന്ന പ്രകാശ കേന്ദ്രമായിരുന്നു സയ്യിദുനാ ഗൗസുൽ അഹ്ളം സയ്യിദ് മുഹ്യുദ്ധീൻ അബ്ദുൽ ഖാദിർ ജീലാനി (റ). അവിടത്തെ സരണിയാണ് ഖാദിരിയ്യ. ഇന്ത്യയുടെ ആത്മീയ വിഹായസ്സിൽ ജ്യോതിസ്സായ ഇന്ത്യയുടെ സുൽത്താൻ ഖാജാ മുഈനുദ്ധീൻ ചിശ്തി (റ) വിന്റെ സരണിയാണ് ചിശ്തി.

ശൈഖില്ലാത്ത ഒരുവന്റെ ഷെയ്ഖ് ഇബ്‌ലീസായിരിക്കുമെന്ന് ഗൗസുൽ അഹ്ളം തങ്ങൾ പറഞ്ഞിട്ടുണ്ട്. നാഥനെ അറിയാൻ നിങ്ങൾ അവനെ അറിഞ്ഞവരോട് തന്നെ ചോദിക്കട്ടെ എന്നത് ഖുർആനിന്റെ അധ്യാപനമാണ്. ദൃശ്യലോകം പരീക്ഷണങ്ങളുടെ ഒരു ലോകമാണ്. ഇവിടെ മനുഷ്യനെ കൺഫ്യുഷനാക്കുന്ന ധാരാളം എലെമെന്റുകൾ തീർച്ചയായും അല്ലാഹു പടച്ചുവെച്ചിട്ടുണ്ട്. പരീക്ഷണങ്ങളിൽ വഞ്ചിതനാവാതെ അല്ലാഹുവിനെ തിരിച്ചറിയാൻ ശൈഖില്ലാതെയും ത്വരീഖത്തില്ലാതെയും സാധ്യമല്ല.

വിശ്വാസപരമായി അശ്അരി, മാതുരീദി സരണികളും കർമ്മ ശാസ്ത്ര പരമായി ഷാഫിഈ, ഹനഫീ, ഹമ്പലീ, മാലികീ സരണികളും ഉൾകൊള്ളുന്ന ആത്മീയ വഴിയാണ് നൂരിഷാ ത്വരീഖത്ത്. ഖാദിരി, ചിശ്തി പോലെ പ്രമുഖമായ ത്വരീഖത്തുകൾ സംഗമിച്ച ജാമിഉസ്സലാസിൽ സയ്യിദ് അഹ്മദ് മുഹ്യുദ്ധീൻ നൂരിഷാഹ് ജീലാനി (നൂരിഷാഹ് സാനി സർക്കാരിന്റെ നേർ പിതൃവ്യൻ) തങ്ങളുടെ അവിസ്മരണീയമായ പരിഷ്‌കർത്തവ്യം മുതലാണ് ഈ മഹത്തായ വഴി നൂരിഷാ ത്വരീഖത്ത് ഇന്ന് വിളിക്കപ്പെട്ടു തുടങ്ങിയത്.